7-27(wed) 2005書展之忽發奇想

一年一度o既書展又o黎喇…須知道我係一個完全無文化o既人, 由細到大咩書都唔會睇 (被逼睇o既教科書除外啦…但我都係只會“larp”o下)…只係會買“香港電視” (即依家o既tvb週刊) 同埋睇報紙o既娛樂版…去書展只係我消磨時間o既一個活動, 並唔係為o左去買書, 所以去唔到都唔係一個損失!

點知今年又陰差陽錯地唔洗排隊就去到喎…世事永遠都係“有心栽花花不開, 無心插柳柳成蔭”o架啦…仲有免費飛添…終於就係咁消磨o左一個晚上!

原來書展只係1990年先開始, 我仲以為好耐以前已經有添…以我呢d咁唔睇書o既人, 都o係“無心插柳”之下去o左12 out of 16屆 (中間可能有一兩年無去都唔定o既…)…真係一個奇蹟! 不過其實當年書展真係幾多o野睇o架, 有好多明星o既簽名會, 又有cd/雜誌大平賣! 記得當年我都無啦啦o係華星攤位附近撞到我當年仲好喜愛o既sammi…仲有“明週”o既攤位, 同埋以前有一本雜誌叫“100分”o既攤位 (薄chit chit, 內容無無聊聊…但我又好鍾意睇喎! 係咪意味著我個人極其無聊呢?!) , 都有好多o野睇同埋好多精彩o既平雜誌拾…都幾唔錯o架!

今年書展睇到好多“特別”o既書籍, 當中包括好多o既“日記”結集成書…台灣o既“交換日記”已經興o左好多年, 仲已經出到第唔知6定7本…原來呢d日記形式o既書籍真係有佢o既market…d人成日叫我將我呢個日記結集出書…但我絕對懷疑除o左我o既朋友因為“友情搭夠”而會掏腰包買呢本“芒姐日記”之外, 仲有咩人會肯拎錢出拿買??? 你話好似o個個梁詠琪同埋楊采妮咁, 無啦啦又學人出本“交換日記”o黎呃錢咩? 我larp過o下…內容空泛之餘仲要係double-line spacing+電腦打出o黎, 只係個人名係親手寫…會唔會行貨o左d呀? 直頭都唔知係咪佢o地自已寫o既…係一本毫無誠意之作! 好失望!

另一本係個friend特登推介俾我睇o既書, 佢話俾個封面吸引o左, 同埋話一定o岩我睇…呢本o野係一個台灣人出o既, 叫做

“尋找港劇達人”
(佢o地話“達人”o係日文係朋友咁解…連本書個名都好台灣style囉, 又中文又日文咁…令我諗起佢o地o既前總統李登輝…)…大家可以click入以上o既link睇o下本書o既簡介…個作者仲話做過唔知咩電台/電視台記者/編輯…等我仲懷住極期待o既心情去翻閱呢本書…點知…大家不妨自己去書局揭o下睇o下我o既comment中唔中肯啦…!

我的comment: 直頭一大失望囉…我想用嚴重呃錢o黎形容! 全本書都係東抄西抄…當然, 天下文章都係一大抄, 但你抄都抄得有技巧d, 再自已重新整理o下, 加入自己o既意見呀…! 內容雜亂無章, 係就係好“包羅萬有”呀, 又有介紹多年來o既香港電視劇, 又介紹n咁多個藝人, 仲有d多年來港劇全紀錄, 節目表, 人物關係表 (即係好似上次我post o個個“創世紀”圖表一樣), 多年來藝員訓練班一覽表, 仲無啦啦整d “跟著港劇遊香港” , “實用的廣東話教學”…好似“大雜會”咁, 立立雜雜咩都有d!

但最大問題係o個d三十年來無線節目表同埋藝員訓練班一覽表, 全部我都o係網上睇過, 仲要係一年前o既事…你係周圍copy人o地d o野都整理o下好o卦?! 同埋你依家係出書, 唔係求其o係自己個blog度寫d o野, 仲要一本賣成港幣83蚊…會唔會呃錢o左d?! 早知咁好賺, 我都寫番本啦…對唔住, 我係好唔知醜o架喇, o係呢方面我唔會謙虛…我覺得寫呢方面o既o野, 我絕對有資格同knowledge過佢囉…同埋至少我會認真d, check清楚d資料同埋整理得統一d先出書…事關我就咁larp都發覺好多資料都係錯o既, 仲要d藝人o既介紹, 有一d就有profile, 有一d又無…好明顯係佢o係網上搵到d咩就照copy落去, 好求其囉!

睇本咁o既o野睇到我把幾火…又或者係我妒忌人有書出囉…唔得! 我要訂下目標…o係下年書展時要出到本俾佢更精彩更詳盡o既“港劇迷”書…發夢都無咁早呀嘛…我知啦!!!!!

最衰香港真係無呢個market…同我一樣年紀o既香港人, 大部份都唔再鍾意睇港劇, 反而迷上節奏更慢, 似番廿年前港劇o既日/韓劇…又或者正正係因為似廿年前 (即80年代) o既港劇…咁先吸引人啦 (因為我都係最迷80年代o既港劇)! 相反, o係內地/台灣/東南亞/海外o既華人, 仍然好熱愛港劇, 程度比起廿年前o既香港人更甚…我覺得如果我出本咁o既書o係海外發行…係會有market囉…哈哈!

各位朋友, 唔講喇…我繼續去發夢喇!