7-12(tues) “奪命真夫”結局篇之2

(續前篇)

上期講開“奪命真夫”之奸人篇, 個監製都話搵人做劇中個外貌敦厚, 但實則奸到出汁o既阮文山…絕不作他人選, 唔搵溫兆倫都唔知搵邊個好!

佢話溫兆倫演奸角比做忠角好, 其實我覺得佢做亦正亦邪o既角色更加無得揮…好似“我本善良”o既齊浩男咁!





(奸人上位實錄)


不過10幾年後再睇番佢做奸角, 做呢d兩頭瞞 (今次應該係三頭添) o既角色…真係有d “義不容情”丁有康o既影子! 其實o係呢套戲上之前, 曾經o係報紙睇到一段關於此劇o既介紹, 都幾抵死同埋到肉o下:

“下周無線推出新劇“奪命真夫”, 終於見唔到吳卓羲, 馬國明(芒按: sorry, 都見到…咁點算?), 陳豪同胡杏兒, 好睇唔好睇, 都值得開香檳慶祝. 奪”屬於奇情懸疑劇, 在近排多齣無無聊聊白癡劇中, 實屬有深度的高智慧型, 好o岩大家動動腦筋…

女主角蘇玉華, 飾演被溫兆倫逼害的苦命女人, 演藝學院出生的她, 戲好得無話可說, 只是有時略嫌有欠自然, 久未有新劇出街, 連宣傳活動都要拋胸上陣, 只好歎句世風日下…

男主角溫兆倫, 最出名是他的觀眾緣, 連累搭上他的女人如郭羨妮者, 都如同諸九族, 人氣江河日下, 近排大聲疾呼已飛甩“發瘟”, 星運才叫重見起色, 能不叫人驚歎“發瘟”的魔力嗎?

不過今次新劇做一個大奸角, 觀眾大可將滿腔怨憤, 全程代入, 恨之入骨…”

講真, 雖然佢講到我 “15年前的偶像”人見人憎…但某程度上佢都係講緊真話, 同埋幾中肯o下!

其實自“陳梅馨事件” (即係佢同人分手就人追番d拍拖費, 仲搵法庭出禁制令禁止女方出國讀書…跟住再將件事搬上電視o係度拗一餐…其實我真係戥佢好醜…分手都唔洗分得咁核突o架嘛! 無論誰是誰非, 做男人o既都唔好做到咁小家呀!), 同埋傳聞佢向佢老婆追番“青春損失費” (呢件事我都係半年前因為“我本善良”上網search佢d o野先知道…唔係好知究竟係咪真係有d咁o既事?! 咁o既索償真係聞所未聞…同埋用咩指標去衡量個損失呢? 個女人損失o既青春難道比佢少?!)…佢o既形象真係直插谷底, 一缺不振…就算之後做咩都洗唔到底…於是唯有o係香港消聲匿跡o左好幾年, 都2002年o既“流金歲月”先正式走番出o黎…但已經中年發福o左好多! 不過男人總kum老過女人o既!

所以我都覺得今次個奸角簡直開正佢o個瓣, 同埋佢o係大部份香港觀眾心目中…根本就係一個奸人!

睇完佢o係呢套戲o既表現…仍然保持一貫水準, 根本演奸角就係佢最擅長o既一環…不過比起 “我本善良”o既齊浩男, 真係老o左同埋發o左d福…畢竟都人到中年啦, 世上又有幾多個劉華呢?

同埋, 我仍然覺得陳鍵鋒真係有d溫兆倫o既影子, 不過我相信佢做奸角就仲未夠火喉! 仲有, 朱翁d戲好屎呀…佢都係做番婦女節目或者旅遊節目比較自然!

最後, 呢一part其實應該留番去“k-100自由講”o個度講, 係要投訴無線資料搜集做得唔夠準確…醫生話俾我o地知原來“蠶豆症”通常只會o係男孩子度發現 (因為o個d “xy chromosomes”o既問題…但可惜我對上一次讀bio已經係10年前f.5 o既時候, 所以都唔多記得喇!), 而且係由媽媽傳俾仔…o係呢套戲度就剛巧調轉晒…或者佢為o左要講林保怡發現個女唔係佢然後俾曾偉權逐步搶晒佢d o野…但係畢竟電視都係灌輸知識o既一個好重要途徑…教壞晒d觀眾 (包括我本人) 咁就唔好啦!