H-E-J-N-O-M <=> 芒姐再現之...舊日的足跡+英倫遊記: 06/18/05

上個禮拜有朋友忽然間同我講: “喂, 你偶像去o左做纖體代言人喎!”…我初時諗極都唔知佢講邊個, 仲以為佢講陳妙瑛添 (須知道有一期我係試過幾鍾意陳妙瑛, 仲走去寫信俾佢…以前都唔敢講俾人聽, 但自從上次食飯同d朋友講開, 大家仲一齊笑o左一餐之後, 我覺得講出o黎俾大家聽笑o下都好呀! 即管笑囉…!)…跟住佢話: “你個偶像…邵美琪喎!”

果然, 上個禮拜就出?一角仔封面, 見佢著住性感衣著拍?輯大膽照…點知今個禮拜仲激!!!!!!!!!!!!! 前幾日經過雜誌攤, 見到個寫住“邵美琪-裸晒示威”o既封面…嘩! 真係嚇到呀…心諗:“洗唔洗咁激呀?!”只係想講一句：“窮途末路”!　真係feel so sorry for我親愛的偶像囉! 你話第二個都無咁驚呀, 但係邵美琪喎! 佢不嬲低胸衫都唔著多件o架喎…受o左咩刺激呀? 唔係真係咁窮途末路呀?! 都唔洗咁盡地一舖呀?!

就係因為有我“偶像”o既一個咁激封面, 我二話不說就用o左廿蚊雞買o左本“壹仔”睇 (須知道我已經好耐無買雜誌睇, 以前都有定期買tvb周刊, 依家真係甚少買雜誌, 仲要係廿蚊一本咁o既書其實頗唔抵…但係為o左“偶像”…無計啦!)

其實齋睇個封面已經嚇個半死喇…成40歲人先無啦啦走去行性感 (應該係超性感), 真係咩都唔著拍寫真喎…靚就唔係話唔靚o既, 但係同佢一貫o既形象+性格好背道而馳囉! 廿年來建立o既形象忽然間蕩然無存…你話李珊珊不嬲走開性感形象, 咁搵條蛇玩o下都無邵美琪忽然o黎一個裸晒咁嚇死人囉!

雖則佢就話今次呢個決定同錢無關, 只係因為從未試過咁fit, 想襯青春留倩影o個類說話啦…又話依家個人開朗o左好多, 唔似得“奪面雙琪”o個期咁終日唔願面對群眾, 一日摺埋自己! 但都唔洗咁“開放”自己呀?! 我真係覺得好唔似佢囉! 佢不嬲o既形象係好硬朗, 有型, 男仔頭o架嘛…忽然間搞d咁o既o野令人覺得佢可能真係撈得唔多掂!

o個張封面谷胸裸睡o係海上面o既相真係激o左d, 反而著泳衣o個張影得仲靚好多! 真係從未見過佢咁fit…的確係不得不佩服我“另一偶像”陳妙瑛o既眼光同埋能力…佢係幫人減肥+豐胸得幾好成績o既!

o個篇文章跟住少不免又會有邵美琪廿年來o既經歷, 講番佢由廿年前入行, 跟住一路被受力捧平步青雲, 90年代成為無線最受迎o既當家花旦…點知識o左o個個鄭伊健, 從此萬劫不復…為o左碗“鄭伊面”退出娛樂圈, 點知碗面發表完o個d咩“照顧佢一生一世”o既懶深情宣言後, 經唔起狐狸精梁fing琪o既誘惑, 將青春不再o既邵美琪掟o左…是為1999年轟動一時o既“奪面雙琪”事件! (睇番呢d報導令我再次憶起o個個“好勝gigi”當日個得戚衰樣…好克人憎!)

(按圖放大: “我一世照顧佢”訪問)

跟住又講o下邵美琪o係“奪面雙琪”事件之後復出, 但已經風光不再, 由以前o既一線頭女主角, 淪為二線尾女老角, 要做郭羨妮, 佘詩曼同埋吳卓羲呀媽…好坎坷! 個樣亦勁憔悴+殘+皺…即使佢另一個有情有義o既舊男友戚其義仍然搵佢演出佢所有o既大製作…但係已經紅唔番起! 所以今次見到佢可以40歲人再次艷光四射, 重拾信心…我o地應該戥佢高興o既!

邵美琪就奇蹟地靚番晒, 唔知我另一個“我本善良”偶像-溫兆倫…有無機會再起番呢?! 15年後o既今日, 我o地會唔會有機會睇到個“中年版”o既“我本善良”呢?! 邵美琪回復當年勇, -而溫兆倫個look都唔算走樣得太交關o者…無線應該可以諗o下依家拍番套“我本善良”續集呀…! 算啦, 我講o下o者…我知無人會認同我!