H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期六, 5月 21, 2005

5-21(sat) 學警雄心結局篇

今日睇預告先發覺“學警雄心”結局篇無啦啦由今晚調o左去禮拜1,2晚….原來因為“大長今”o黎o左, 真係遲來的長今啊! 但係咁樣將個結局放o係禮拜1,2晚, 然後禮拜3先播新劇o既安排真係好騎呢, 都唔知想點…我印象中好耐都無試過! 個新劇又唔多吸引, 相信我可以完完全全咁轉去睇呢期力追o既“美麗傳說2之星願”…呢套劇我要極力推介, 不過今日唔講住, 等大家睇多幾集先!

點知頭先去睇節目表, 又發現願來“美麗傳說2”下個禮拜開始又調o左去10點鐘先播…咁即係點呀? 玩o野呀?! 今個禮拜人o地要睇“學警”結局篇, 你就走去放o係9點線搞到我要兩邊走, 出o左街又只可以是但錄一套…咁你即係趕絕我o者?! 搞到我miss o左幾集, 你又唔好似以前“殭屍”咁朝早播一次, 夜晚又播兩次, 跟次weekend就重播番成個禮拜整整5集…咁先o岩o架嘛, 包你miss o左都可以追番!

跟住深夜我又要睇“創世紀”, 朝早又重播“再生緣”, 跟住前日睇節目表仲俾我發現朝早5點幾亞視又又又重播“Q表姐” (呢套雖然我睇過無數, 但係套劇白白痴痴咁, 又真係睇完又睇都仍然幾kum睇)…幾年前重播先睇過, 但又無無聊聊咁想再睇番…咁樣搞法d時間好唔見洗!



雖然其實“學警”d劇情真係好唔掂, 仲有愈做愈騎呢之嫌, 但個劇種我幾buy, ,d集體生活o既戲好係我杯茶! 同埋我幾鍾意睇楊怡拍吳卓羲, 尤其係楊怡…雖然佢o係呢套劇個造型唔多靚, 但我覺得佢d演技由初出道開始已經幾好, 再加上外型幾討好…反而唔知點解佢家姐楊卓娜個樣同個格會同佢差咁遠, 似做d奸角或者湯盈盈o個類勾引人o既角色…唔講都真係無人信佢o地係兩姐妹!

我記得2001年楊娜o岩o岩選完港姐, 跟住楊怡第一套擔重戲o既“昏前婚後”又推出, 當時因為佢被喻為“翻版張可頤”, 而呢套劇佢又係做張可頤個妹, 所以忽然間多o左好多人識佢! 跟住無啦啦有報導話原來呢兩個完全唔啦間, 又唔似樣, 又唔多覺佢o地有一齊出現過o既楊娜同楊怡原來係兩姐妹 (但其實個名係幾似o既), 我覺得如果話佢同張可頤係兩姐妹反而有說服力好多!

同埋o係“再生緣”入面o既楊怡其實都幾討好, 因為佢o既古裝扮相基本上係幾掂, 好過葉璇同胡杏兒!



亦都要再講多次, 我完全唔明點解“學警”監製要安排李sir死囉…好夾硬呀! 為o左要煽情就夾硬又整個大賊出o黎, 仲要成個警隊無晒人o既, 一定要個教官無啦啦出山, 跟住就殉職…為煽情而煽情…呢d劇唔應該搞d咁sad o既ending o架嘛!

仲有, 我同d同學仔研究過, 大家一致認為顧老板d戲簡直係0個“得”, 教學警o既戲都還可以接受, 但一到d談情位同埋含情脈脈位, 簡直想死! 上次“妙手2”同埋“洛神”係咁, 今次亦唔見得有咩進步! 放過d觀眾啦…!