H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期一, 2月 28, 2005

2-28(mon) 西廂奇緣

依家播完“甜孫爺爺”, 但仲有一線劇要追; 因為8點線o個套“西廂奇緣”, 我都幾鍾意睇! 個故事就完全唔掂o架喇, 我直頭以為自已睇緊粵語長片…d老土橋段真係唔該晒! 但係d人我就ok buy…有葉璇嘛! 雖然大家都唔認同我…但我覺得佢真係幾掂喎! 不過我都相信佢個人有d問題…如果唔係唔會有咁多人不滿佢! 同埋佢個古裝look真係好過時裝look好多, 今次個扮相都算過得去o既!

基本上呢套係一套古裝年青版o既“衝上雲霄”…但係又有o個個“高威利”, 點解無線要力捧佢?! 不過佢個“荒淫”皇帝角色都討好過吳卓羲個壞鬼書生o既…真係好yim悶呀! 反而佢同胡杏兒合唱o既主題曲都幾ok喎…佢仲唱得有d似陳小春添! 胡杏兒都唔差, 但之前話有人簽佢出碟, 咁又未夠班, 如果作為歌星o既standard…就真係唔多掂!

最搞笑係商天娥彷彿同許紹雄變成新螢幕情侶, 呢套戲佢o地又做一對!



至於最煞食o既“大長今”, 我真係無睇過! 我相信呢套劇製作幾認真o既, 亦都會係好睇o個隻…但正如上次無睇“金枝慾孽”一樣, 大眾鍾意睇o既o野, 我未必會鍾意睇! 同埋我真係唔好古裝劇+韓劇…呢d純屬個人喜好…尤其無時間之下更加要作出取捨! 所以新o個套“心花放”我諗我都唔會睇! 陶大宇同郭可盈…10年前我真係幾buy o既…但係依家…!

仲有亞視為o左紀念林伯, 居然o係黃金時段9:30重播“我來自潮州”…都幾大陣丈o下! 咁又係o既, 林伯對亞視o既影響又確係幾大, 應該隆重其事o既! 呢套重播劇我反而有d興趣重溫喎!

哎! 點解最忙o既時候就反而最多好戲睇o架?!