H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期六, 12月 11, 2004

12-11(sat) 歡樂滿東華2004 (上)

o岩o岩過o左o既12月11日, 又係“歡樂滿東華”o既大日子, 年年都有o係度講o下呢個show, 今年都唔可以破例! 可惜我個歡樂滿東華ringtone已經無用武之地, 因為我長期都係用震機!

而我亦都無再好似以前咁神心特登碌番屋企睇“東華”, 只係錄o左佢就算! 但係咁o岩o個晚又係“我和殭屍有個約會III”大結局, 取捨之下唯有放棄“殭III”, 希望佢好快會重播啦! (但係佢今次又真係無咩點重播喎, 之前“殭I”&“殭II”都係一日播幾次, 跟住weekend又再播…保證你唔會miss o架嘛! 今次可能因為要出vcd, 所以唔重播!)

之前先o係度講緊話不如打個電話去捐o下錢, 支持o下我最愛看o既籌款show! 但唔知捐$10得唔得o既呢?! 又或者捐$500但係叫佢分50次打出o黎又得唔得呢?! 須知道電視o既air time係好貴o架嘛, 有得出多d緊係開心d啦! 仲要係我咁多年o黎都好鍾意睇o既節目喎! 記得我以前細個好鍾意同表姐一邊睇呢d籌款show, 一邊o係電話度輪流跟住字幕讀出善長o既名稱…但依家可能疏於練習, 再加上個人真係老喇, 所以睇o左一陣眼都花埋, 仲睇到好心煩, 好氣燥…可能係更年期o既徵狀!

至於個節目本身, 真係悶到抽筋! 其實近年o黎都幾悶o架喇…不過今年簡直yim悶指數創新高!

最好睇o個part當然係我每年都會向大家推介o既“全台藝員卡拉之星大唱遊”啦…簡直係極盡騎呢之能事! 大家無論點都一定要睇, 因為即使你有咩唔開心, 睇完都包你開心番晒…笑到肚攣! 我直頭坐o係度自己同自己指住個電視笑o左一大餐囉! 雖然我真係好眼“目訓”, 但都死撐睇埋呢part先!

我完全唔知點解有d人會咁唔知個醜字點寫?! 其實佢o地都明知其他人, 包括d觀眾都係笑緊佢o地o架啦, 但都要年年咁自己搵個機會俾人笑, 真係唔明! 除o左家燕姐之外, 其他o個9個藝員基本上係全年o係其他大show都唔會見到佢o地o既蹤影, 唯獨o係呢度可以滿足o下佢o地o既表演慾, 但真係好似睇動物園o既表演咁…d人o既奇裝異服同出位行徑, 真係嚇到你死!

o個個上年做手語唱“強”o既王維德 (無線4線咖喱啡…但大家睇到佢個樣一定認得!), 話自己今年練o左隻更快更勁o既歌…原來係“無極”喎! 佢真係標準城城fans…今次仲著埋d野人衫做手語, 好頂癮!

仲有o個個黃樂兒, 依家好似做掌門人o既獎品小姐…當年我睇兒童節目都有見到佢o架, o個時叫黃玉鳳嘛…又係o個句, 改o左名完全唔見得會紅o左! 佢o係兒童節目唱歌都算ok o既, 但絕對唔會係好o個隻囉, 同埋絕對唔可以出o黎表演囉! 佢仲要著條公主裙…我仲以為halloween表演添! 仲有佢d濃裝…嚇死我! 以前睇兒童節目都覺得佢幾唔靚o下 (因為d兒童節目姐姐大部份都係揀d好樣o架嘛), 但係有一日o係銅鑼灣地鐵見到佢…又唔太差喎! 不過佢上鏡就真係…! 同埋佢d騎呢o既舉動+懶可愛o既表情+聲線…簡直令我乳鴿都差d嘔埋出o黎!

再o黎幾個都係年年都會出現o個隻…鄺佐輝啦, 魯振順啦, 王俊棠啦, 同埋鄧汝超! 全部都笑爆咀!

另加一兩個連我都o翕唔出名o既 (可知佢o地o既知名度有幾高)…但通常呢幾個都反而會唱得幾好! 但係呢d人就真係只會曇花一現…下年都未必再會見到佢o地出o黎!

(下期續)