H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期一, 6月 28, 2004

6-28(mon) 勁歌vcd

前o個排睇報紙話勁歌頒獎禮出o左vcd, 等o左咁耐終於有得重溫番呢d經典頒獎禮…尤其係80年代o個d…正! 無線果然識得搵錢呀o下, 我相信呢d大show vcd會幾有市場…遲d最好出埋港姐, 新秀或者台慶囉!

o係銅鑼灣行o左好多間vcd舖都唔見有, 前幾日終於俾我o係旺角見到…不過我唔會買住, 等過o左一陣平d先…橫掂呢排都無時間睇!

我最想睇番84年o既勁歌, 因為有我舊年篇日記-“salute to a legend”提及過o既哥哥同一大班dancer又唱又跳“Monica”o既盛大場面…真係超精彩, 而且o個年亦有其他好多好歌!

85,86,87年o既頒獎禮我就已經o係KPS執笠前租晒o黎睇喇…所以我希望可以睇番88-90年, 尤其係90年, 有華仔第一次拿最受歡迎男歌手, 亦有鄭秀文, 黎明, 曾航生, face to face, 吳婉芳等拿新人獎…一個樂壇青黃不接o既年代…但係亦都係一個新朝代o既開始, 所以好有紀念性!

至於之後o既勁歌頒獎禮, 我大部份都有晒, 亦都無咩興趣重溫番, 所以唔需要買喇…慳番!

喂! 唔好講少, 我真係要再講多次…“隔世追兇”的確好好睇, 依家每日要追兩線劇集, 真係追得我好吃力!

而o個套“一屋兩家三姓人”除o左個名超娘之外, 劇裏面o既暱稱亦都真係娘到爆囉! 咩“蕉蕉”同”蕉媽”…簡直係肉麻當有趣! 十年前都話興呢d懶係有趣o既稱號o者, 咩”咪當我lu lu”呀, “咪當我Robert”等低能白痴稱呼/口頭禪…但係依家真係唔該唔好囉!

套劇整體都ok好睇…見到好多昔日小童星依家個個都大個晒…都幾有趣呀!

十年前o係“刑事偵緝檔案”做郭可盈姨甥女“棠棠”o個個小妹妹黃美棋, 依家都已經要飾演一個亭亭玉立o既少女…好似當年o既江麗娜咁 (依家叫唐寧)…好得意!

搵到幾個好pro o既童星網站…好掂o架…大家得閒可以去睇o下!

http://shingkaying.com/hkchildstars/index2.html

http://geocities.com/soannj/