H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期三, 6月 02, 2004

6-2(wed) PP Gals

上個禮拜5返到屋企又睇o左少少“新EYT”, 今個禮拜o既主題係d“懷舊金曲”, 又係o個d名曲滿天星o既班底, 最特別係有o個個“大-AL”囉, 佢d歌我以前真係無咩聽過, 淨係早排o係“大飲茶”入面睇過佢o既專訪, 播o左少少佢當年拿金唱片o既片段…而o個隻得獎歌叫“發你個財財”!

今次終於都聽到晒成首“發你個財財”…又確係幾得意幾騎呢…不停咁“發你個財財…發o下你個財財財”…聽到我都好想發o下財! 唔知卡拉ok有無得唱呢隻歌呢?! (o岩o岩search到原來係黃霑包辦曲詞…唔怪得知咁掂啦!)

講開卡拉ok無得唱o既歌…我發覺好多好歌o係k入面都係無得唱o既…真係令人實望!

好似我上個禮拜5睇“翡翠音樂幹線”o既“經典金曲”系列, 當晚o既主題就係樂隊組合…居然俾我聽番90年代都ok“經典”但已俾人遺忘o既組合Face to Face 第一首主打同名歌曲“Face to Face”同埋“花生女郎”(PP Gals) o既“DJ Boys”! 呢兩首歌我由當時直至現在都幾鍾意聽, 可惜唔係成日都會聽到…o係卡拉ok亦都絕對無得唱!

Face to Face o既“Face to Face”咁經典居然無得唱, “face to face相隔空氣…”…我細個好鍾意唱o架! 所以唱k時通常只可以唱佢o地另一首經典歌曲“情迷milano”頂住先…呢首都幾好聽o架…仲有d好頂癮o既手部動作配合…之不過呢兩首歌唯一唔好o既地方就係不停咁repeat, 呢個亦都係80年代尾-90年初o既歌曲一大特色!

至於PP Gals, 完全係o係樂壇“檀花一現”o既組合, 唔知有無半年就摺o左! 但係當年佢o地首“DJ Boy”我都好鍾意聽o架…個mv我仲錄低o左keep到依家添! 最鍾意係佢o地好假咁拎住個結他o係度一邊唱一邊扮彈…係好假, 但係咁先過癮!



唔知大家記唔記得其中一個成員係依家o既無線“當紅花旦”張可頤呢? 當時我已經好留意佢…唔係因為佢靚, 而係因為佢係最醜樣o個個, 仲要“寧寧瀉瀉”唯一一個短髮同埋高o左出o黎…好怪雞! 好記得佢當時o既英文名叫Tina (真係唯獨記得佢…仲有另一個比較靚o既長髮姐姐, 即係拍能得利果汁橡皮糖做天使&魔鬼o個個, 但唔知佢叫咩名!), 點知佢3年後走o左去參選港姐居然叫Maggie…不過一認就認得佢啦! 依家o既佢比起當年, 甚至係選港姐時都靚o左好多…我唔係話佢整容, 只係話原來一個人懂得裝扮真係可以差咁遠!

我仲好似記得當年係鄭敬基一手捧起 (相信唔可以用“捧紅”呢個詞語) 佢o地…點知數年後張可頤自己都居然紅過鄭敬基好多倍 (仲要o係 “九五至尊”入面, 張係做女主角, 鄭頂晒龍都只係一個男配角…世事o既o野, 好多都係你估唔到o既!)…當然, 做最受歡迎女主角又唔代表咩o野o既…好似郭可盈話齌:“贏o左獎輸o左品”呀嘛…我覺得呢句說話都真係幾搞笑!

另外, 呢期我發覺boyz o個首“去邊度”騎呢得o黎幾好聽喎…又輕快又熱鬧!

仲有o個個冬菇頭妹妹吳日言…我覺得佢個樣好似以前YET o既老臣子吳麗珠!仲要兩個都姓吳…佢o地係咪有親戚關係o架?!