5-26(wed) 黃凱芹夢幻傾情演唱會2

尋日講開“夢幻傾情演唱會”裏面o個個極度“夢幻傾情”o既歌舞劇…阿chris自己創作o既故事真係令人極度失望…個主題居然係去“找尋真愛”, 最後發現“真愛原來一直在心中”…唔該晒! 老土到爆, 仲要無內容可言…中學d話劇都好睇過佢!

仲要用“找尋真愛”去串連成個故仔, 話主角因為失戀所以周圍去找尋真愛, 因此就去到呢個&o個個地方, 見到一干人等 (即佢d嘉賓)…每人出o黎唱首歌…呢d橋條令我諗起“綠野仙蹤”個主角沿途遇到o個d鐵甲人呀, 蹈草人呀, etc (不過人o地卡通片d橋條都精彩過佢好多)!

d角色名亦都膽得很…咩“貓貓女”, “折翼天使”, “寂寞的心135&246”…你話難唔難受呀? chris, 點解你咁江郎才盡呀? 點解你唔見好就收呀?

唱得最好o既嘉賓居然係“心情仍然很爛”o既dior (sorry, 人o地依家叫emme)…其實我覺得佢隻“戒男”係幾好聽o架喎…佢唱live亦都唔差, 跳亦跳得幾好, 係個樣比較克人憎…所以同佢同類型但係唱得差過佢100倍o既yumiko會紅過佢咁多! (雖然我都係buy yumiko多d…但平心而論, 王依汶o既整體舞台表現其實好過yumiko好多…因為鄭小姐一開口真係嚇死人…唱live仲要無一粒音係準o既!) 但係反應最一般亦都係佢囉, 反而o個個全城最姣o既蔡一傑, 一出場d人真係尖叫晒, 好似餓o左好耐咁…好明顯去睇o既大部份都係同我o地一樣o既80年代人, 所以對當時大紅o既草蜢同埋一傑哥都有一份情意結!

一曲走天涯o既一傑哥好明顯好肉緊佢呢次難能可貴o既紅館演出機會 (需知道即使o係梅姐演唱會, 佢都無機會唱佢隻係就係好聽, 但係已經唱到爛o既“失落園”…甚至連草蜢o既經典名曲, 佢o地都無咩機會唱!)…所以佢簡直係施展渾身解數呀…一開始已經超大聲唱爆咪咁款…需知道唔係大聲就有感情o架…大聲唔代表會好聽 (咁當然好過細聲到聽唔到o既倫永亮!)…肉緊得滯係會幾攞膽o既! 仲要佢o既服裝係一套黑衫加一對白色護翼, 佢仲不停咁用身體o既扭動去將兩隻翼擺來擺去…極具美感! 見到佢呢一d舉動, 我完全覺得佢比任何女星更適合去拍衛生巾廣告…因為真係好似點郁動都咁“舒服”!

至於倫永亮同李國祥…倫永亮就一向都無期望o架喇, 因為佢從來無唱得好過! 佢作曲或者做和音會幾好o既, 但係每次佢自己去唱一隻歌都暴露o左佢把聲弱到唔恨o既缺點! 點解佢會走去出唱片o架? 簡直係自暴其短! 我曾經同d同學仔努力咁去諗佢究竟唱過d咩歌? 結論係除o左佢同人合唱o既歌外, 大家一隻都o翕唔出…真係so sorry! 佢都係安份守己去做番佢唱片監製吧啦!

至於李國祥, 亦都唔知點解好似無咩聲咁…同以前“餘情未了去又來”o既佢相比, 跌o左唔少watt…係咁因為食得丸仔多呀?!

今次成個演唱會, 主要都係比一d平時唔會有機會登上紅館大舞台o既3線歌手一嘗踏上紅館滋味…我覺得阿chris個人真係好為“朋友”囉! 但係就唔多為佢o既觀眾…睇完成個演唱會, 我唯一想同佢講o既都係: “唔該晒!” (x10)