1-15(thurs) 經典再重現

講番之前想講o既o野, 不過講埋呢幾日就真係唔好講住喇…新年流流嘛!

前幾日睇o個個梅姐特輯, 真係好好睇…尤其d 80年代陳年片段…最珍貴o個段當然係佢參加新秀時o既片段啦…之前真係從未睇過成隻歌o既足本片段囉! 好痛恨點解自己唔早出世4, 5年, 咁就可以親眼見證80年代最光輝o既香港樂壇! 依家唔係見證唔到o既, 不過o個時太細個, 都未真正識得去欣賞o個d節目…到我大個之後o係KPS食個“水尾”租番d 85,86,87年度o既勁歌頒獎禮o黎睇…嘩, 真係精彩到痺…d歌亦都好聽到痺…可惜“往事只能回味”! 算啦, 依家慨嘆“生不逢時”已經無咩意思, 倒不如等我襯新年o個丁屎咁多日假期重溫番我d精彩o既80年代節目錄影帶!

講番新秀…嘩! 真係從來無見過咁光芒四射o既參賽者…即使往後o既張衛健, 譚耀文o個種懶係“載歌載舞”o既參賽者, 都完全無得比! o個種老練同埋揮洒自如…有咩可能可以o係往後o既新秀比賽中搵到呀?!

o個晚去酒樓食飯, 個電視又係播緊呢個節目, 好明顯當晚所有人都係望住部電視囉…見到梅姐o既表現亦都不禁目瞪口呆! 最難頂係隔離[木台]有個“口水多過茶”o既哥哥o係度識少少扮代表…首先係一見到蔡楓華做新秀司儀, 就o係度好…大…聲….咁同佢o個位o個兩個女性朋友重覆咁講o左幾次:“嘩! 蔡楓華呀!”…大佬, 鬼唔知係蔡楓華咩…你估淨係你先識蔡楓華咩?! 終於佢好大聲咁講到第3次, 我忍唔住好不屑咁望o左佢一眼…真係好鬼煩…嘈喧巴閉阻住阿姐睇電視!

跟住剪出o黎o既每個片段佢都好一知半解咁向大家講解一下, 又咩佢明明好肯定“將冰山劈開”係梅姐同許志安合唱, 點解o個個片段係帶草蜢出o黎唱…我諗其實因為o個時根本無人識許志安, 所以好多live show都係帶草蜢出o黎唱完“愛將”再順手唱埋落去…是但啦! 跟住到梅姐同譚校長邊唱邊跳出o黎, 佢又話:“係啦, 阿倫每次跳舞個鏡頭都要震o下震o下, 咁先顯得佢無跳得咁差…!” 講真, 我又唔覺得阿倫真係跳得好差囉…克勤同華仔o個d先叫差嘛! 同埋我又真係唔覺得個鏡頭好震囉…影跳舞係咁o架啦!

一路到尾佢都無停過, 簡直伴唱咁款…我同阿媽都忍唔住交換o左個鄙視o既眼神…真係呀! 阿姐都未開聲, 你o係度扮expert?! 所以臨走前都不忘要回頭bear佢一眼, 再俾一個極之鄙視o既笑容佢!

講真, 其實阿梅姐都唔係完全無靚過o既 (雖然以前o既印象的確如此…因為真正識睇佢o既時候已經係80年代中期!)…睇番佢o係新秀個樣, 都算ok清秀呀! 無o左後期o個d怪化裝, 反而無咁老成!

聽講話原本梅姐把聲係高音o個批o喎, 仲要係次次登台都唱鄧麗君d歌…到之後唔知因為聲帶發炎定咩病, 先改唱徐小鳳d歌! 可能呢d就真係賽翁失馬o既最佳例證…因為佢如果唔係走呢個低音歌路, 都唔會咁突出! 而事實上女人唱低音係比起高音有型同吸引好多 (純屬個人見解, 你絕對可以唔認同!)…你知我不嬲都buy低音人多過高音人o架啦, 加上佢把聲真係型囉…that’s why我亦都打從何韻詩參加新秀起已經好buy佢…因為佢把聲都一樣咁有型!

下次去k, 一定要唱一大推“salute to梅姐” o既歌! 雖然平時都會唱, 但係今次一定要唱埋一大堆平時無唱開o個d!