H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期日, 1月 11, 2004

1-11(sun) 勁歌後記

o係大家睇到呢篇o野o既時候, 我已經dum o左個心不下10 0o下再咆哮o左15分鐘…先平息o左少少我o既怒氣! 今次仲dum心過上次, 因為真係幾有把握嘛, 攞o個d錢去食餐飯都好呀! 仲要係今次我真係有坐言起行, 走上個網址去開埋個account, 但唔知點解過唔到錢又落唔到注…係咪我遲得滯呢?!

克勤倍率都有1.2呀, 容祖兒都好似有1.5, 咁賺番幾百蚊都好呀! 畢竟呢d都比中“6合彩”機會率大好多! 其實都唔係齋博彩o架, 我都做o左成廿幾年research …廿幾年係咁風雨不改捕o係電視機前面睇勁歌金曲, 所以叫我估呢d賽果絕對有把握過攞d錢去買股票囉…不過依家又再見財化水喇!

下年我一定要準備充足d (聽住先啦!), 免得又再再再一次o係度怨天怨地…不過我相信通常o係呢d情況之下, 下年一定唔會估中o架喇, 到我真係買o左又唔會咁好彩o架啦…世事永遠都係咁! 算囉…正所謂“唔係你財, 唔入你袋”!

其實勁歌總選去到呢個年頭已經唔多好睇, 同80年代簡直無得揮! 不過算啦, 年代已經唔同, 無得比…雖然總會覺得新不如舊! 但係最好以後可以減o左d司儀o既又無謂又唔好笑o既台詞…今年d司儀o既表現真係唔多好, 氣氛亦都搞得好差…最懷念都係兩年前許志安攞男歌手o個段…氣氛真係搞得好好! 相比起o黎, 今次就變得好沉悶+乏味!

仲有, 其實我覺得容祖兒真係未夠班攞女歌手, 不過“時勢造英雄”, 無得好講!

而全場最核突o既場面就係關心妍同阿“o雪o雪o雪”蕭正楠攞o個隻合唱歌獎…實唔實致名歸已經唔重要, 而係當諗起佢o地舊年o係度搞緋聞做宣傳, 又o係報紙度講埋d懶“溫馨”o既說話…點知唔夠一年之後佢o地居然反晒面, 即使o係台度到交唔到戲, 面左左咁款…好戥佢o地尷尬…真係好核突! 其實佢o地兩個都咁鍾意博出位又鬼死咁作狀, 本身就好“天生一對”, 又何必“分手”呢?!

另外, 今日晏晝經過香港殯儀館, 又未見有好多人去致祭喎, 只係見到有d記者o係門口囉! 其實如果聽日唔洗咁樣瘋狂排幾個鐘隊, 我都會去拜祭o下梅姐o架, 畢竟佢o既“忘我”精神真係好值得我o地學習, 簡直係香港人的驕傲!