H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期六, 1月 10, 2004

1-10(sat) 2003勁歌總選

今晚又係一年一度o既“勁歌總選”大日子, 經過舊年o係呢度齋預測然後狂“dum”心口之後, 本來今年真係諗住坐言起行去“賭番舖”, 幫補o下d “卡拉ok”費都好呀…點知, 又係人算不如天算, 唔知點解因為種種原因之下令我“幾經辛苦”都落唔到注, 可能個天都叫我唔好“沉迷”賭博 (但好明顯我無沉迷呀!)…總之我今年又再次見財化水啦…所以我依家好希望我估o既全部都唔中…大家o係呢度同我一齊祈求…請大家一齊合埋眼, 雙手合十, 朝住 “麥加”方向, 口中唸唸有詞, 一齊o翕: “唔中, 唔中, 唔中…”!

好喇, 依家等我o係呢度講出我o既心水啦…

1)男歌手: 李克勤啦…唔需要多講!

2)女歌手: 我估容祖兒, 黑馬楊千嬅, 但只有大約20%機會, 因為佢今年走去拍埋晒一jar無聊片, 同埋今年容祖兒叫做比較走勢凌凌厲, 再加上如果男女歌手都同上年賽果一樣, 咁就毫無驚喜, 大家會悶嘛! 所以無線點都想玩少少gimmick!

3)金曲金獎: 我估係“7友” (雖然有d冷門, 但我鍾意咁估呀!), 再唔係同叱吒一樣俾“必殺技”囉! 但如果容祖兒拿唔到女歌手, 就應該會俾佢o個隻“我的驕傲”! 不過呢個獎年年都有驚喜, 尤其係呢幾年勝在成日都“你估佢唔到”, 所以分分鐘整隻“水瓶座”都唔出奇!

其他o個幾十百個獎就無謂估喇, 費事寫10幾頁都寫唔完!

另外, 尋晚走o左去睇“載譽歸來”, 又再重演幾日o既“酸酸甜甜香港地”…上次已經有同事同我講話幾好睇, 估唔到真係唔錯喎…d歌幾好聽, 幾7,80年代feel, 歌詞亦幾抵死! 真係好typical o既“輝黃”出品! 可以請到佢兩個再出山, 果然係有兩度! 個故事本身亦都ok…歌舞連場, 仲有d歡樂今宵feel添! 佈景亦都算唔錯呀, 而d演員亦都演&唱得唔錯! 真係抵佢無咩點宣傳都有咁多人睇, 仲可以encore多次! 我推介!