1-8(thurs) 夕陽無限好…

其實關於星期日梅姐o個個紀念特輯, 我仲有o野未講完…!

我想話全晚最感人o個兩個片段, 莫過於91年o個個“飛躍舞台10載情”show, 剪番佢同埋一班徒弟 (包括當時仲好紅o既草蜢, 未係點紅o既許志安, 同埋依家已經蒸發o左o既譚耀文), 一齊排晒舞又唱又跳”Stand by me”, 好有型, 好好睇, 好掂!

另外一個感動位就當然係完show時全部嘉賓行出去對住螢幕, 同梅姐一齊唱“夕陽之歌”啦!

而螢光幕亦都播出梅姐o係最後一個演唱會唱最後一隻歌o既片段…好明顯佢o個時已經好辛苦, 好虛弱, 但都用意志力死撐落去…我真係好佩服佢! D人 (包括我自己) 成日都o係度怨天怨地, 話生命幾咁痛苦, 生活幾咁逼人, 但係睇見梅姐咁樣都照撐到最後一刻…可能我o地都再唔好意思o係度怨!

試諗o下平時生一粒“飛滋”都痛到揪筋啦, 但係做完唔知電療定化療係會成個口爛晒, 就算唔係食o野, 就咁都痛到死啦…何況要走上台又講o野又唱歌, 痛苦程度可想而知! 仲要o係身體極度虛弱之下企足成晚, 同埋o徙好大力氣去唱歌…真係好辛苦!

其實佢把聲同埋中氣都已經大不如前, 我睇o個場直頭一開場唱o個幾首歌都無咩聲, 後尾時好番d! 不過我真係好慶幸我有去到睇佢呢個最後演唱會…雖然o個晚忽然間好多o野做, 趕到揪筋, 仲要走之前到未做完晒d o野…搞到心掛掛咁, 睇得唔係太暢快!而且其實又唔算特別好睇…不過總算俾到梅姐一份支持, 仲“好彩”地睇到華仔做嘉寳o個場, 所以都算係“揀”o岩o個晚o黎睇…加上如果今次唔睇, 以後已經再無機會睇到…!

第1次去睇梅姐o既演唱會係99年, 以前細個從未睇過! 本來只係諗住湊熱鬧咁去睇o下, 點知o個次真係超好睇囉, 仲要$50飛…超~值~呀! 睇完o個次演唱會o既唯一感覺係: “佢確係一個天生o既表演者, 梅艷芳真係屬於舞台!” 所以之後佢02年再開演唱會, 都即刻買飛去睇…點知佢o個次居然走去搞埋d突破, 咩歌舞劇咁, 仲要將d耳熟能詳o既歌曲改晒arrangement, 搞到面目全非!

o個次o既演唱會就真係超唔好睇喇…不過依家知道佢原來o個時已經生cancer, 真係不得不佩服佢當時o既體力同歌藝, 以致身材同樣貌都無走樣…完全睇唔出佢係身患重病囉!

其實對於佢呢一種追求完美o既表演者, 睇到自己o既狀態一日一日咁下降, 但係仲要盡力務求以最美一面俾觀眾睇, 奈何佢自己把聲都已經沙晒同埋d氣亦都好明顯唔多夠…加上知道自己大限將至, 仍要對住所有觀眾扮作若無其事…真係好慘!

佢o係最後演唱會時面上o個種無奈, 係無論點都掩蓋唔到…好慘好慘! 臨尾仲要一個人好辛苦咁撐上o個段長樓梯, 簡直見到都戥佢辛苦…但點都唔夠最後佢回眸苦笑, 向大家揮手道別o既情景來得傷感! 因為佢個樣係完全話俾你知, 佢都知道以後再無機會同歌迷再相見…好唔捨得, 但又可以點樣?!

其實死並唔可怕…最可怕係知道自己會死…要等死o個段時間!

點解人生會咁o架? 佢咁熱愛生命, 點解唔俾佢一個生存o既機會呀?

佢病重時仲一手策劃 “1:99演唱會”, 自己咁辛苦仲一味掛住幫人…真係太好人, 太偉大囉…一個人能夠有咁多好朋友, 真係一定有佢o既原因! 依家真係好想睇番“1:99演唱會”呀…咁好睇o既節目, 點解會無人有錄o架?!

(btw, 無線今個星期日下午會重播番兩個月前梅姐o個個“告別”特輯, 大家可以去重溫番…但我就真係唔想再睇番喇!)