1-3(sat) 叱咤風雲

前晚都一如以往咁好落力又聽又睇“叱咤”…聽o下佢o地點樣吹眠d聽眾同埋煽動d歌手o既情緒都好呀…當然我絕對相信有一大部份o既歌手係演緊戲! 仲有梗係唔少得要聽o下俞琤o既一番“肺腑之言”啦…每次都會感動落淚…係笑到喊o個隻!

前晚就係俾d人喊晒d時間, 居然可以搞到成12:30都未完…唔知d住o係新界o既人點返屋企呢? 唔知商台要陪幾多錢呢? 好彩我無去睇, 如果唔係除o左悶死之外, 仲要唔知幾點先返到屋企! o係屋企聽起碼d悶位可以去o下廁所, 食o下o野, 行開行埋呀! 好心商台見到d人講咁多廢話, 就cut o左佢o地啦, o徙晒d時間!

不過無線播o既版本又真係cut得多o左d, 唔知有無剩番1/3?

仲要連一開始向巨星致敬o個part都幾乎cut晒…咁佢不如唔好即日走去播, 好似以前咁到禮拜日或者新年期間播足本仲好啦…好過睇d“枝離破碎”o既片段!

其實我好懷疑喊可能係o係叱咤得獎o既其中一個pre condition, 如果喊唔出o既, o係日後會被收番個獎, 又或者下年唔洗再見! 但係有d又真係喊得好核突, 好over囉~!

同埋我絕對唔相信李克勤可以得到“我最喜愛的男歌手”…唔係話佢唔好 (你知我都ok buy佢), 而係投票o既人全部都係商台fans, 個頒獎禮仲要係無公開賣飛, 去得o既人大部份都係商台擁蠆, 已經俾佢o地洗o左腦, 無可能會投俾商台封殺o左10幾年o既克勤o既…好假囉! 好似2年前同樣頒o左個“我最喜愛的女歌手”獎俾sammi, 又係一個我曾經好鍾意o既歌手 (嘩…“浪族闊少爺”o既男女主角呀!!!), 係人都知sammi唔係商台杯茶, 但居然又係咩獎到攞唔到之後ending得o左個“大獎”…擺到明係造出o黎啦, 想表示自己大公無私, 想製造話題, 等翌日報紙o既報導篇幅大d! 枉小時候o既我仲覺得“叱咤”係一個最公平o既頒獎禮, 咩一人一票呀, 民意為尊咁…全部都係扼細路o既o者…難為當年“天真無邪”o既我俾佢扼o左! 正如我去年所講, 所有頒獎禮都無公平o架喇, 只係睇o下邊個無“造”得咁核突同埋邊個o岩自己心水d咪叫最公平囉!

仲有“必殺技”居然攞到“最喜愛歌曲”…真係有d搞笑! 呢隻歌確係幾好聽 (至少好過o個隻“看! Mario為lover, spider都去擋…”, 但又未至於可以攞到“最喜愛”o卦?! 不過我都好戥佢同阿“文文”高興…佢兩個確係多年來都唱得幾好而d歌亦都唔錯o既…抵佢o地可以鹹魚翻生 (sorry, 阿“文文”話佢應該係“鯉魚翻身”喎!)

同埋我想話估唔到阿鄭融唱live幾有水準喎…unexpected! 好過o個d自命實力派o既歌手呀…無錯, 我主要都係指盧巧音…佢d歌就好好聽喇, 但唱live真係一次比一次嚇人! 佢初出道唱“垃圾”o既階段都ok o架喎, 但就愈唱d喉嚨“腚”聲愈勁, 仲10次有11次都走音, 今次仲甩埋咀添…無啦啦又拉埋“梅姐”落水話雖然佢曾經叫過佢唔好喊, 但係都忍唔住喎! 大佬, 真係好核突囉…咁樣賴落去…甩咀就甩咀啦, 唔洗搵d咁o既藉口去解釋呀?! 我真係唔覺得佢同梅姐有咁熟囉!

講開唱歌嚇人…個龍嫂yumiko都真係嚇死人! 佢個look就幾型, 個樣都ok, 跳舞亦幾好, 但係歌藝就…真係阿dior (sorry, 人o地好似改o左名叫emme) 都唱得好佢10倍呀! o係o個個“豬肉”頒獎禮度佢罕有地唱live, 嘩! 真係唔唱由自可…一唱嚇到我呀! 簡直係前所未有咁難聽, 仲要佢先天聲線上o既缺陷加埋超凡o既歌唱技巧…我會俾佢10個恐怖囉! 終於搵到個人可以同bobo匹敵!

仲有o個個“新人銅獎”蔡一傑…真係唔該晒佢! 好明顯佢仍然停留o係90年代初, 以為自己仲好有型, 仲係草蜢裡最紅透半邊天o個個! 著埋d騎呢衫, 仲要擺埋d騎呢pose, 不停咁刻意show胸肌…真係好可怕呀! 我覺得佢已經步向蔡楓華o既路徑…so sorry!