11-19(wed) 台慶大過天

點~搞~呀~…你話呀…?!

點解我無上網去“買番舖”呀? 真係o徙晒! 今晚台慶之後, 不停有人打電話或者send message俾我, 話我估中o左大部份賽果, 有無去參加台慶“8喜臨門連環賞”?! 哎…依家真係好dum心…上次勁歌總選又係咁, 今次台慶又係咁…兩次都見財化水! 我o既好朋友們, 你o地亦都因為咁無o左餐食! Sorry!

不過算啦, 可能到我真係賭番舖o既時候, 就唔會咁好彩估得中, 到時“人財兩失”仲dum心! 講真, 錢呢d o野, 係你o既就係你, 唔係你o既就唔係你o架啦! 贏o左“牙較戰”都叫做好過無呀!

講真, 今年台慶確係有d悶, 仲好公式化添…係一開場眼花撩亂o既opening比較精彩, 因為根本快到你都未睇清楚邊個打邊個…就已經完o左! 而頒獎禮就更加一年比一年公式化, 個flow都悶過人, 頒獎禮都係亞視台慶搞得好d, 至少都新穎d同埋溫情d!

而d賽果亦都ok大路, 好高興係張可頤唔係宣萱…雖然從來張可頤發表o既偉論, 我都唔知佢o翕梗咩…由佢94年選港姐到依家都無變過…好似精神錯亂咁亂郁+手舞足蹈…仲要死唔斷氣 “ngar”晒人o地d時間, 成個郭富城拿最受歡迎男歌手o個時咁樣!

阿旺就真係一d驚喜都無…最慘就係頒之前加插o個段無聊5大男主角“演繹得獎心情” o既環節…好明顯o個5個人 (除o左郭晉安ok歡容…因為pre-得獎o既喜悅已掩蓋一切“鄙視” 之情) 都極度不屑, 明知無拿仲要人陪玩咁耐, 尤其吳鎮宇個鄙視樣就真係出晒o黎…呢d就係合約藝員同非合約藝員o既分別! 而主持o既DO姐亦都好慘, 要逼人玩埋d咁o既o野, 仲要扮到覺得好“有聊”咁…真係好“有聊”囉!


(2003台慶賽果總結@大飲茶)

至於林峰同楊怡…都係我o既心水, 之前已經講過, 唔再重複喇! 不過講真, 我真係無估到楊怡可以拿到囉…雖然佢一路都演得算幾好, 但係佢o既知名度同人氣都好似唔夠廖碧兒或者葉璇! 林峰亦都係套套戲都做得唔錯, 不過講到“躍進”, 我覺得佢舊年躍進過今年好多囉…但係舊年俾人氣爆燈o既陳豪拿o左都好合理o既…今次呢個遲來o既獎項, 總算好過無呀!

亦都估唔到真係俾我o翕中…個最佳拍檔獎真係俾o左“4葉草”o個幾個細路…雖然我都幾鍾意睇呢套劇, 但我唔覺得佢o地deserve呢個獎囉…完全係俾面阿石修哥! 唔怪知得佢要做番個台慶司儀o黎報答無線啦!

最怪都係個咩“實力非凡”獎頒o左俾鄧萃雯…原來佢已經被定位為一個甘草演員…好可憐…下年會唔會係邵美琪呀?!

成個節目最o岩o個樣可算係終於無用港姐冠軍o黎做司儀…之前年年睇到d出爐港姐做台慶都已經戥佢o地好吃力, 尤其o個個一成不變, 背稿背到好似小學生朗誦咁o既楊思琦, 同埋連講一句o野都要窒三次o既劉慧蘊…見到佢o地都好可憐, 睇o既觀眾亦都好辛苦! 今年o個位曹敏莉, 我個人認為佢應該提早摺埋囉!

話雖如此, 我都仍然好落力咁睇晒成個節目, 連食飯都三爬兩撥搞掂, 之後就好全神貫注咁由頭到尾望住個電視機3小時!