11-17(mon) 一週年

一年前o既今日, 呢個網上日記首次同大家見面, 雖然我由到達倫敦o既第一日, 己經開始寫呢個 “英倫遊記”, 但係講到成功“排除萬難”搵到個“竇” 將佢upload上o黎同大家見面, 應該係2002年o既11月17號, 台慶前兩日!

估唔到話咁快就一週年, 時間真係過得快到你估唔到…好多謝咁多位支持o左我一整年o既 “忠實讀者”, 遲o下如果我發o左達, 一定會搞d有獎遊戲報答下大家…好似台慶o個d“8喜臨門連環賞”咁! ~~等我~~!

仲有兩日就台慶, 又有朋友問我今年台慶有咩心水…講真又真係無咩喎! 記得上年寫完o個篇台慶獎項預測之後, 引起好大迴響 (最大迴響不外乎係叫我唔好再讀我o個科, 去做番記者! fine…我確係寫得好開心, 但我係唔會去做娛記o既…得閒o係呢度廢o翕o下, 娛人娛記咪算囉…變成工作就會成為一個burden!)…頭先我仲特登走去睇番o個幾篇日記, 果然係有質素過近期o個d作品好多….可能一個人o既精神同埋體力真係有限, 專心一致去做一樣o野總會做得好d…有時睇番自己舊年寫o既日記, 都會忍唔住發出會心微笑!

今年我當然都會照舊預測吓台慶大獎, 但就唔會好似上年咁detailed, 因為上半年o既戲我都無睇過, 好難作出一個公平準確o既預測!

男主角唔洗講啦, 除o左阿旺仲有邊個? 完全無競爭, 亦都無驚喜!

女主角我諗係張可頤同宣萱之爭, 個人prefer張可頤多d…宣萱d戲多年停滯不前, 加上個樣真係好殘…不過我無睇過“95至尊”, 唔知點評論!

飛躍男演員我估可能係陳鍵鋒, 佢今年表現的確幾出色, 仲有黃宗澤都幾出位 (雖然我由佢幾年前主持下午音樂節目已經唔多buy佢)…我最buy o既都係林峯, 佢舊年攞唔到確係可惜!

飛躍女演員其實我覺得最應該攞o既係楊怡, 不過佢好似仲未夠班去攞; 所以我估最大機會係廖碧兒! 葉璇都有可能o既, 因為佢呢期多戲上, 但今年佢o既表現確係無舊年o既“再生緣” 咁出, 但都尚算唔錯…舊年我最buy佢, 佢就輸o左俾當時人氣超勁o既胡杏兒; 今年到我好buy “律政新人王” o既胡杏兒, 佢就已經上o左位無得候選呢個獎項喇!

至於o個d最佳拍檔, 舊年連黃子華同佢d“窿窿” 都可以得獎, 咁夾硬o黎, 我都唔知點估! 戲劇組o既個人喜好當然係“律政新人王”o個4位新人王啦, 不過我估可能係“皆大歡喜” 或者 “衝上雲宵”o個堆人都唔定!

非戲劇組就更加唔知點揀…睇完張宣傳單張, 原來“4葉草”o個堆人都算係…明明係套戲, 又何來“非戲劇組”呢? 都唔知佢點分o既?! 我估可能係“大飲茶”o個堆主持, 佢o地都alright呀…就咁決定!

跟住今年仲新加o左d咩“實力非凡男女藝員”, 其實咪即係甘草演員獎…咁都好o既, 俾多d鼓勵唔同o既演員嘛…但係居然連蔣志光都要列入呢個category, 都唔知應唔應該替佢高興! 其實個個實力都差唔多, 我諗男o既可能係石修 (你睇佢o係“衝上雲宵”幾咁“出”就知啦!), 一係就係黎耀祥; 女o既會唔會俾家燕姐呢? 再唔係蘇玉華都唔錯呀!

又係好似上年咁一輪咀講o左好多好多, 又係好似上年咁覺得非常暢快…台慶, 真係每年都能夠帶俾我無限歡樂! I LOVE TVB!!!