8-12(tues) 連阿叔都讚好!!!

本來前晚諗住睇埋“黃馬vs泰國”o既比賽, 但係原來我真係唔係特別鍾意睇足球; 前幾日o既“瘋狂” +“投入”, 完全係源於一份“愛國愛港”o既情懷! 人人都知我有幾咁“local”o架啦…“香港”o既一切我都支持o架! 尤其係去完外國之後, 就更加深切體會到世界上無一個地方, 可以媲美我o地o既香~港~…你話我bias都係咁話o架喇!

o係香港大球場舉行呢場球賽, 加埋現場o既氣氛, 仲有o個幾日香港o既成個大氣候…所有“天時地利人和”加埋…先會令一眾好似我咁o既“非典型球迷”, 破例投入地觀賽! 亦正如新聞所報導, 就係呢鼓“愛港”情操, 令到現場本來一面倒支持黃馬o既球迷; o係中港聯入o左第一球之後, 全部改為為自己人喝采!

阿特首真係應該搞多d呢類大型活動…居然可以令所有香港人o係回歸以o黎首次拋開怨氣, 暫時忘卻大家對各方面o既不滿, 齊心為香港喝采! 連民望都無啦啦升番幾個percent, 你都咪話唔神奇!

睇黃馬球賽o既另一個“得著”就係“有幸”聽到克勤哥哥一次比一次騎呢o既“足球主題曲”(偶像都係咁話!)…最深刻就係佢重複o左3次o既歌詞: “連阿叔都讚好”! 即場仲影埋阿叔度…第一次佢好受落咁“樹”起大姆指; 第二次已經顯得有點煩躁, 但都照俾面咁做o下手勢; 到第三次, 佢直頭鏡頭影埋去都費事做表情喇!

點知禮拜日o係屋企百無聊賴睇電視, 居然發現原來呢首騎呢足球歌係“足球小將goal”o既主題曲! 本來都唔係特別認得, 但係一聽到o個句“連阿叔都讚好”...就即刻記得啦! 克勤果然係勁…勁在識“利用”阿叔個朵o黎宣傳隻歌嘛!

連卡通片主題曲都唱埋…克勤果然落力! 抵佢拿最愛歡迎男歌手! 克勤, 我睇好你今年再下一城o架! 你唔好令我失望!