H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期四, 4月 03, 2003

4-3(thurs) SALUTE TO A LEGEND (1)

呢兩晚都好“早” ?, 因為要“煲”晒所有紀念哥哥o既電視及電台特備節目...雖然日日咁“捕”住各電視台/電台, 但今次TVB同ATV o既緩慢反應真係令人好失望, 第一晚係一d特備節目都無, 第二晚先好求其咁整o左個所謂悼念節目! 之前鄧麗君或者其他明星死o既時候, 都會即晚播番佢d舊音樂特輯或電視節目…但今次居然繼續播番粵語長片!

之後同朋友傾開話希望無線播番邊d哥哥o既節目…大家都話想睇“武林世家”, 因為真係好耐無睇過, 亦記得真係好好睇o既! 本來“儂本多情”當然係最經典, 我最推介o架啦; 不過之前己經重播過好多次, 仲要後5集係超慘o個隻, 所以我都係想睇番好耐無睇過o既“武林世家”多d! 點知我o地尋晚一講完, 今日就聽到TVB真係話下個星期開始重播“武林世家”, 我向大家極力推介…記住睇!

無線o係今個禮拜六o既黃金時間仲會播番89年o既張國榮經典音樂電影“日落巴黎”, 真係俾獎門人恨到啦, 佢一話想睇就真係播喇! 呢個確係一個好精彩o既音樂特輯, 記得89年初, 我o岩o岩買o左部新錄影機, 呢個音樂特輯係我當時錄o既第三餅錄影帶 (我點解咁記得係因為餅帶一路都貼o左個“3”字o係度, 仲keep o左好多年…幾年前先因為覺得自己唔會再?o黎睇, 所以洗o左! 依家o個餅錄o左其他o野o既“3號帶”仲o係我d影帶collections度!)

不過我最想睇番o既都唔係呢個特輯, 而係一個好多好多年前, Leslie同李麗珍拍o既一個音樂特輯! 我諗我o個時4,5歲啦, 只係記得個特輯係關於時光倒流, 仲好似係有一隻“跎表”去牽引住, 拍得好靚, 仲好得意! 呢個特輯o係o個幾年係成日重播o既 (好似o係90年代初就成日重播克勤同林穎嫻+劉小慧+關淑怡o個個音樂特輯), 但近10年就好似無咩播過, 所以都好想睇番!

買定晒錄影帶諗住錄番一系列精彩節目, 點知TVB只係好敷衍咁o係“翡翠音樂幹線”播3晚佢o既MTV; 仲要有一半係佢復出後, 我覺得一d都唔好睇/聽o既MTV (個人意見啦!), 其他揀o既歌都唔係最好o個d; 連我最想睇番o既“儂本多情” MTV都唔播…你唔係咁呀? 我o個日一起身睇佢o個個咩“SMS熱點唔知咩節目”o岩o岩睇到呢個MTV o既一小部份, 我從來都未見佢播過…可惜無即時錄低! 以為咁經典o既MTV呢幾日佢一定會再播…點知今次佢居然唔播…激氣呀! 點先可以搵番呢個MTV?